85:1 in finem filiis Core psalmus

85:2 benedixisti Domine terram tuam avertisti captivitatem Iacob

85:3 remisisti iniquitates plebis tuae operuisti omnia peccata eorum diapsalma

85:4 mitigasti omnem iram tuam avertisti ab ira indignationis tuae

85:5 converte nos Deus salutum nostrarum et averte iram tuam a nobis

85:6 numquid in aeternum irasceris nobis aut extendes iram tuam a generatione in generationem

85:7 Deus tu conversus vivificabis nos et plebs tua laetabitur in te

85:8 ostende nobis Domine misericordiam tuam et salutare tuum da nobis

85:9 audiam quid loquatur Dominus Deus quoniam loquetur pacem in plebem suam et super sanctos suos et in eos qui convertuntur ad cor

85:10 verumtamen prope timentes eum salutare ipsius ut inhabitet gloria in terra nostra

85:11 misericordia et veritas obviaverunt iustitia et pax osculatae sunt

85:12 veritas de terra orta est et iustitia de caelo prospexit

85:13 etenim Dominus dabit benignitatem et terra nostra dabit fructum suum

85:14 iustitia ante eum ambulabit et ponet in via gressus suos