81:1 Psalmus Asaph. Deus stetit in synagoga deorum ; in medio autem deos dijudicat.

81:2 Usquequo judicatis iniquitatem, et facies peccatorum sumitis ?

81:3 Judicate egeno et pupillo ; humilem et pauperem justificate.

81:4 Eripite pauperem, et egenum de manu peccatoris liberate.

81:5 Nescierunt, neque intellexerunt ; in tenebris ambulant : movebuntur omnia fundamenta terræ.

81:6 Ego dixi : Dii estis, et filii Excelsi omnes.

81:7 Vos autem sicut homines moriemini, et sicut unus de principibus cadetis.

81:8 Surge, Deus, judica terram, quoniam tu hæreditabis in omnibus gentibus.