128:1 Canticum graduum. Sæpe expugnaverunt me a juventute mea, dicat nunc Israël ;

128:2 sæpe expugnaverunt me a juventute mea : etenim non potuerunt mihi.

128:3 Supra dorsum meum fabricaverunt peccatores ; prolongaverunt iniquitatem suam.

128:4 Dominus justus concidit cervices peccatorum.

128:5 Confundantur, et convertantur retrorsum omnes qui oderunt Sion.

128:6 Fiant sicut fœnum tectorum, quod priusquam evellatur exaruit :

128:7 de quo non implevit manum suam qui metit, et sinum suum qui manipulos colligit.

128:8 Et non dixerunt qui præteribant : Benedictio Domini super vos. Benediximus vobis in nomine Domini.