147:1 Alleluja. Lauda, Jerusalem, Dominum ; lauda Deum tuum, Sion.

147:2 Quoniam confortavit seras portarum tuarum ; benedixit filiis tuis in te.

147:3 Qui posuit fines tuos pacem, et adipe frumenti satiat te.

147:4 Qui emittit eloquium suum terræ : velociter currit sermo ejus.

147:5 Qui dat nivem sicut lanam ; nebulam sicut cinerem spargit.

147:6 Mittit crystallum suam sicut buccellas : ante faciem frigoris ejus quis sustinebit ?

147:7 Emittet verbum suum, et liquefaciet ea ; flabit spiritus ejus, et fluent aquæ.

147:8 Qui annuntiat verbum suum Jacob, justitias et judicia sua Israël.

147:9 Non fecit taliter omni nationi, et judicia sua non manifestavit eis. Alleluja.