4:1 In finem, in carminibus. Psalmus David.

4:2 Cum invocarem exaudivit me Deus justitiæ meæ, in tribulatione dilatasti mihi. Miserere mei, et exaudi orationem meam.

4:3 Filii hominum, usquequo gravi corde ? ut quid diligitis vanitatem, et quæritis mendacium ?

4:4 Et scitote quoniam mirificavit Dominus sanctum suum ; Dominus exaudiet me cum clamavero ad eum.

4:5 Irascimini, et nolite peccare ; quæ dicitis in cordibus vestris, in cubilibus vestris compungimini.

4:6 Sacrificate sacrificium justitiæ, et sperate in Domino. Multi dicunt : Quis ostendit nobis bona ?

4:7 Signatum est super nos lumen vultus tui, Domine : dedisti lætitiam in corde meo.

4:8 A fructu frumenti, vini, et olei sui, multiplicati sunt.

4:9 In pace in idipsum dormiam, et requiescam ; quoniam tu, Domine, singulariter in spe constituisti me.