80:1 In finem, pro torcularibus. Psalmus ipsi Asaph.

80:2 Exsultate Deo adjutori nostro ; jubilate Deo Jacob.

80:3 Sumite psalmum, et date tympanum ; psalterium jucundum cum cithara.

80:4 Buccinate in neomenia tuba, in insigni die solemnitatis vestræ :

80:5 quia præceptum in Israël est, et judicium Deo Jacob.

80:6 Testimonium in Joseph posuit illud, cum exiret de terra Ægypti ; linguam quam non noverat, audivit.

80:7 Divertit ab oneribus dorsum ejus ; manus ejus in cophino servierunt.

80:8 In tribulatione invocasti me, et liberavi te. Exaudivi te in abscondito tempestatis ; probavi te apud aquam contradictionis.

80:9 Audi, populus meus, et contestabor te. Israël, si audieris me,

80:10 non erit in te deus recens, neque adorabis deum alienum.

80:11 Ego enim sum Dominus Deus tuus, qui eduxi te de terra Ægypti. Dilata os tuum, et implebo illud.

80:12 Et non audivit populus meus vocem meam, et Israël non intendit mihi.

80:13 Et dimisi eos secundum desideria cordis eorum ; ibunt in adinventionibus suis.

80:14 Si populus meus audisset me, Israël si in viis meis ambulasset,

80:15 pro nihilo forsitan inimicos eorum humiliassem, et super tribulantes eos misissem manum meam.

80:16 Inimici Domini mentiti sunt ei, et erit tempus eorum in sæcula.

80:17 Et cibavit eos ex adipe frumenti, et de petra melle saturavit eos.